នាព្រឹកថ្ងៃទី១៨ ខែតុលា ឆ្នាំ២០២៣ នៅសាលប្រជុំពិសេស៣ វិមានព្រឹទ្ធសភា គណៈប្រតិភូសភា នៃព្រះរាជាណាចក្រកម្ពុជា ដឹកនាំដោយឯកឧត្តម យ៉ង់ សែម ប្រធានដឹកនាំ និងជាប្រធានគណៈកម្មការទី១ព្រឹទ្ធសភា បានអញ្ជើញជាអធិបតីក្នុងកិច្ចប្រជុំលើកទី៣ ត្រៀមចូលរួមមហាសន្និបាតសហភាពអន្តរសភា លើកទី១៤៧ (Inter-Parliamentary Union 147) នៅទីក្រុង Luanda ប្រទេស Angola ។ កិច្ចប្រជុំប្រព្រឹត្តទៅដោយមានការពិភាក្សាលើរបៀបវារៈដូចខាងក្រោម៖ ១-មតិរបស់ឯកឧត្តមប្រធានគណៈប្រតិភូ ២-ឯកឧត្តមអគ្គនាយកពិធីការនិងទំនាក់ទំនងអន្តរជាតិនៃព្រឹទ្ធសភា មន្ត្រីព្រឹទ្ធសភា និងរដ្ឋសភារាយការណ៍អំពីវឌ្ឍនភាពការត្រៀមចូលរួមមហាសន្និបាត IPU 147 ៣-ការលើកឡើងអំពីចំណុចសំខាន់ៗដែលតំណាងក្រសួងការបរទេស និងសហប្រតិបត្តិការអន្តរជាតិ តំណាងក្រសួងយុត្តិធម៌ និងតំណាងគណៈកម្មាធិការសិទ្ធិមនុស្សកម្ពុជា បានជម្រាបនៅក្នុងកិច្ចប្រជុំកាលពីថ្ងៃទី១១ ខែតុលា ឆ្នាំ២០២៣កន្លងមក ៤-មតិយោបល់របស់សមាជិក សមាជិកា ទីប្រឹក្សា និងមន្ត្រីជំនួយការ ៥-មតិបូកសរុបរបស់ឯកឧត្តមប្រធានគណៈប្រតិភូ សូមជម្រាបថា មហាសន្និបាតសហភាពអន្តរសភា លើកទី១៤៧ (IPU 147) នឹងប្រព្រឹត្តទៅនៅទីក្រុង Luanda ប្រទេស Angola ចាប់ពីថ្ងៃទី២៣ ដល់ថ្ងៃទី២៧ ខែតុលា ឆ្នាំ២០២៣។ ប្រភព៖ នាយកដ្ឋានព័ត៌មាន
